【口語文，略感性】想說些關於吞嚥困難的事。
雖然我吃的其實跟正常人的幾乎沒有分別，但因為大腦麻痺，從小我的吞嚥能力就不太好，就連醫院的藥單上也會有特別註明。
見到自己食三條菜便吐兩條，忽然覺得好氣餒，但明明這不是第一次，我亦不喜歡吃菜，而媽媽也不介意我如此浪費食物。在大多數時候，我都不察覺自己進食的問題。可能是生活中實在充滿障礙，相比之下，吞唔到某啲嘢自然顯得微不足道吧。記得三年多前，我的吞嚥功能突然出現了倒退，後來我被轉介去見言語治療師。他問：「你吞嘢咁差，咁你咪有好多嘢唔食囉？」
我完全係真心膠地搖頭：「唔係呀！」
然後他逐樣問，你食唔食橙？唔食。點解？難吞囉，我吞唔到面頭層皮。你食唔食菜？唔食。你食唔食粟米？唔食。你食唔食麥樂雞？唔食。點解？因為好難吞。除此之外，蕉啦湯丸啦糯米糍啦，一切滑潺潺又黐立立嘅食物，都屬於我吞唔到同唔會食嘅類別。
那刻我才意識到，咦，係喎，原來我有好多嘢係唔食嘅...只係我食唔到嘅全部都咁啱係我唔中意食嘅嘢，所以我一直都唔覺得有問題。
只係，直到今日，我仍然係唔中意食菜、最驚就食橙、食粟米會吐咗層皮淨係食中間啲肉，就連食豬肉牛肉雞肉，好多時候都係嚼完啜晒啲味，就一二三吐返出嚟...唔經唔覺咁就十九年，阿媽話我都係一歲之後先識得自己飲奶，一班人食飯我永遠係最慢兼食唔飽嗰個，所以我由細到大都好很瘦，而加應該已經係我最肥嘅時候。
偏偏我係個好中意食嘢嘅人，身邊嘅親戚朋友都知我係好為食。出街見到嘢食我會好開心，口頭禪係「食嘢係人生最快樂嘅事」。我最中意就係吮骨，因為骨頭只要咬，啃完就係人都會吐，唔會好似食餸咁，𡁻完吐出嚟好浪費。
唔知呀可能係溫書溫到攰，見到枱面啲餸好好食但自己又一如既往咁糟蹋晒啲食物，就覺得有啲唔開心，忍唔住被無奈淹沒。如果可以嘅話，我都想好似細佬咁，大口大口食肉呀。😋
#其實我到底係因為食唔到嗰樣嘢所以唔中意食
#抑或就算我食到都仲會係咁揀飲擇食
Search